யதார்த்தக் கதைகள் - 4

"அப்போ நீ என்னதான் சொல்றே?" எகத்தாளமாய் கேட்டான் சுரேஷ்.
"நீ பெரிய பணக்காரனா இருக்கலாம். அதுக்காக என்னை மட்டமா நினைக்காதே" இது ஜான்.
"அடுத்த வேளை சோத்துக்கு யார் கையையாவது எதிர் பார்க்கும்போதே உனக்கு இவ்வளவு திமிர் இருந்தா என்னை மாதிரி காசு இருந்தா எப்படி இருப்பே?"
"காசு இல்லாம இருக்கலாம். ஆனா அதுக்காக தன்மானத்தை விடறவன் நான் இல்லை, அதைத் தெரிஞ்சுக்கோ"
"வீண் பேச்சு எதுக்கு, மரியாதையா என் வழியில குறுக்கிடாம இரு, இல்ல, விளைவுகள் மோசமாயிடும்."
"கண்ணா, நான் யார் வழியிலயும் குறுக்க நிக்கலை. அதே சமயம் என் வழியில யாராவது குறுக்கே வந்தா, நான் சொல்ல மாட்டேன், செய்வேன்"
"என் பண பலம், ஆள் பலம் அதிகார பலம் இதெல்லாம் தெரிஞ்சும் நீ இப்படி பேசறே, இது நல்லதுக்கு இல்ல தம்பி!"
"என்னடா பணபலம்? குறிச்சு வைச்சுக்கோ, இன்னும் ஆறு மாசத்தில நான் உன்னை விட பெரிய பணக்காரனா ஆகலைன்னா, என் பேரை மாத்தி வச்சுக்கறேன்."
"அதையும் பாக்கறேன்"

"கட், கட்" என்றார் டைரக்டர், "பேக் அப்."

ஷூட்டிங் முடிந்ததும், ஜானாய் நடித்தவர் விலை உயர்ந்த காரில் ஏறிச் செல்ல, "பணக்கார" சுரேஷோ ஆட்டோவைத் தேடினான்.