தாம்பத்தியம்

"ஏங்க,

இது நம்ம நிச்சயதார்த்தத்தில்

நீங்க போட்டிருந்த சட்டைதானே?"

"ஏங்க,

இது நமக்கு கல்யாணமாகி

முதல் சம்பளத்துல

வாங்கிக் குடுத்த புடவைங்க..."

"ஏங்க,

இதத் தெரிலையா?

நம்ம பொண்ணுக்கு

மூணு வயசாகும்போது

நீங்க வாங்கிக் குடுத்த பொம்மைங்க..."

"ஏங்க,

இந்த பேனாவைப் பார்த்தீங்களா?

முத முதல்ல நம்ம பொண்ணு

வாங்கின பரிசுங்க..."

"ஏங்க,

நம்ம பையன் கல்யாணத்தும்போது

யாரோ வெத்திலை பாக்கு துப்பி

கறையான உங்க சட்டைங்க..."

உன் ஞாபக சக்தியைக் கண்டு

பெருமையாகத் தான் இருந்தது.....

"இந்த வீட்டுக்கு வாக்கப்பட்டு

வந்த புதுசில,

ரெண்டு பவுன் சங்கிலி

வாங்கித் தர்றேன்னு சொன்னாரு

உங்க தாத்தா,

ஹூம்!......."

என்று நம் பேரனிடம்

நீ புலம்பும் வரை.

(இந்த கவிதையை உரையாடல் கவிதைப் போட்டிக்கு அனுப்பிவிட்டேன்..)